Matthew 14
Soli Noxou Ioanesi
(Mak 6:14-29; Luk 9:7-9)
1No voxo ane Elodesi muxolu tatananu tuala ne Xalilaia, la mulomusou a'alosou xaixai noxou Iesu. 2La sou muvikalane'i ta mitema sou xaixai noxou lexe, “Itema ane ne anu Ioanesi itema sou u'ulosi'a ta mitema ane. Anu musoli mo mi'asixu ia mumauli a mutulu ne. La sou anu xaviinu sou u'oxonu sosovo iouiou ne.” 3 aXo Elodesi muno'e ou e Pilipi semau sou mu'uluxe, la sou Ioanesi muvikalanu lexe, “Nini ne'oxonu 'ilixo ane ne, umomomo no anu lapuloto noxou Mosesi uasi, sou neno'e Elodia vivine semau la ne'uluxe ne.” 5 bIoanesi muvikalanu Elodesi aloxo ne, la anu la'iaxu, la anu umasaxa lexe uvau mo usoli. Ia u'ume noxi'a ta mitema xo ane'i mi'oxo lexe anu itema sou palomatana vile ane. 6Xe voxo sou isosovo sou voxo ane Elodesi nenu mivo'onu no anu muxali la anu mu'oxonu la'ilali toxoxa'a. Ia no mine ane'i i'ani'ani la Elodia 'ilie sema mi'unalai no nano no tani la milei no ie'i. La Elodesi muisuxu leie ne. 7La sou anu muavuti la musakii vaikala mo muvikala lexe, “Manina teitexi, nini nemasaxau mii ma'ia xe navikalaleli, la eni alosinesi.” 8Xe nenie miavuti la mi'unanu tane noxie lexe imasaxau Ioanesi kisou. La sou ane'i milai mivikalanu mamie lexe, “Eni emasaxau Ioanesi kisou uai no anu la kupapa vile une'e.” 9La tatananu tuala ne opo tu'umaxu manina, ia umomomo sou uxiunu xavutalau uasi. Xo uxavutala no anu vaikala musakiinu noxie 'olu mo muvikala lexe manina teitexi, xe uxavutala noxi'a ta tatila e mine'e no anu la'ilali ne kalumo xo ipupuiou. La sou anu mupalusi'a ta mitema sou 'oto'oto lexe ilai no taasou navunavu mo ixotonu Ioanesi xolanu mo ino'u kisou une'e noxie loxo ane mimasaxau ne. 11Ane'i milai mixotonu xolanu mukalu la mimulaxu kisou no anu lakupapa la sou mino'u mune'e sou milosie vuanga ne. La sou ane mino'u mulai noxie nenie. 12Xe ta molomolo noxou Ioanesi mine'e la sou mino'u vasimolu mulai sou mi'asixu. Ane'i mi'asixu mukalu la milai mia'alou Iesu.Iesu Mulosi'a ta Mitema 5,000 'Ani
(Mak 6:30-44; Luk 9:10-17; Ioa 6:1-14)
13Iesu mulomusou a'alo sou Ioanesi mukalu, la Anu mutelo kokovu no anu uaxa sou mulai no xalee tani e ta mitema se'i ixoxolu no anu uasi. Ia ta mitema no xalexalee tuala ta tatila milomusou la mimulinu mimuamua'i no tava'a la milai mixali. 14Xe no mine Iesu mune'e muxali no tasi'i la mumaisi'a ta mitema tavu'alo ita'ota'olu. La Anu tanuxa'a misevile, la sou anu mupamauline'i ane'i ane pipiena mu'oxone'i. 15Xe no 'olo'olovoxo manina la ta molomolo noxou mine'e mivikalanu lexe, “Anu a'ala'alai sou aso u'una, la sou anu laixe lexe nini napalusi'a mo ilai no tuatuala se'i 'ala'alai 'o mo ilotonuxa'a la'ilali sou i'ou. Xo nenge texolu no xalee lia ane 'o ne ta mitema se'i ixolu no anu uasi.” 16Iesu muavuti la muvikalane'i lexe, “Uasi, ngapalusi'a ilai mamu, ngingi menge ngakamulixa'a la'ilali mo ngalosi'a i'ou.” 17Ane'i miavuti la mivikalanu lexe, “Nexi veleti ta'uvesi xe sinana ta tameisi ane 'o.” 18Xe Anu muavuti la muvikalane'i lexe, “Ngano'u une'e.” 19 cLa sou Iesu mupalusi'a ta mitema ne sou mixolu no lia no ia'eia'e ne. Xe ane'i mita'olu no lia mukalu la sou anu muno'u veleti ta'uve ne ilou sinana ta tamei ne la iou mulai teitexi no opo loxotolo sou mulemolu laixe musuku mulai noxou Lataua no anu. La sou Anu muse'ise'inu veleti ne la mulosi'a ta molomolo noxou sou mimila'anu noxi'a ta mitema. 20Ane'i latala ne mi'ani'ani xo mole mi'ana'ana manina, la sou ta molomolo noxou Iesu mine'e mitaxusou la'ilali matomatovinu pa'upa'usou. Ane'i mitaxusou xe mipitanu, la mitataanu no lakela mavulovexa mo mulu'e lia tamei. 21Itiitisi'a ta mitema e mi'ani ne mumomomo loxo 5,000. Ane itiitisi'a ta mulusi ia ta sema xe ta molomolo ino'u itiitisi'a uasi.Iesu Mumuamua'i no Lexa
(Mak 6:45-52; Ioa 6:15-21)
22Xe alaxu vilesisi 'o la Iesu mupalusi'a ta molomolo noxou sou mitelo no uaxa la miuli milai no xalee vile. No mine Anu mupalusi'a ta mitema milailai. 23 dXe ili'i no mine Anu mupalusi'a ta mitema milailai mukalu, la Anu mutelai teitexi no laxa'ilu vile sou mukilaka. Xe no 'olovoxo la Anusisi muxoxolu no laxa'ilu ne. 24Ia no mine uaxa mulai nopaxa, la xasi mo atume toxoxa'a molu no talaxa'a mune'e ututeletelenu uaxa ne la ulivulivusi'a. 25No mine 'ala'alai sou lamana ukekea la Iesu mumuamua'i no lexa loxo'u mulai noxi'a. 26 eXe ta molomolo noxou mimaisou Iesu mine umuamua'i no lexa loxo'u ia unene'e noxi'a la ane'i tane'i kalaua xo mixavutala lexe male ulee xale'a vile ane, la ane'i miungaunga. 27Xe Anu muavuti la mupasipaa muvikalane'i alaxu vilesisi lexe, “Nga'ume mamu! Peki'ainge xo enisi'a!” 28Xe Pita muavuti la muvikalanu lexe, “Tatila lexe nini manina, la navikalaleli mo amuamua'i no lexa loxo'u, alai noxine.” 29Iesu muavuti la muvikalanu lexe, “Nane'e.” La sou Pita mutaloxo teitexi no uaxa mulu'e la mumuamua'i no lexa loxo'u mulai noxou Iesu. 30Ia no mine anu mumaisou atume ilou xasi toxoxa'a xe mu'ume, la musoko sou u'uo'uo ulu'elai. La sou mu'ava noxou Iesu lexe, “Tila! nasu'ulileli.” 31 fAlaxu vilesisi la Iesu mutolosou avolu mulai la mulapunu mutelo. La muvikalanu lexe, “Nini loopala noxine kitu'asi, mo xavutalameni ta tamei sou ma'i?” 32Xe ane'i ilou mitelo no uaxa la atume ne tasiau. 33La sou ane'i teitexi no uaxa ne mimaisou aloxo ne la mixola'u tava'a sou milotu noxou la mivikala lexe, “Manina misevile, nini Lataua 'Olu.”Iesu Mupamauline'i ta Mitema Mii Pipiena ne Xenesaleti
(Mak 6:53-56)
34Xe ane'i milai la mixali no kupa xalee vile ne Xenesaleti. 35Xe ta mitema no tuala ne mitongonu Iesu la misova anaxa'a mulai no tuatuala ta tatila 'ala'alai no pa'upa'ume'a. La ta mitema mitavutavulene'i ta mitema ane vovolea iouiou mu'oxone'i no luusi'a sou mine'ene'i noxou Iesu. 36 gLa mivikalanu pekia'u lexe ta mitema ane vovolea iouiou mu'oxone'i ne ikasou tokolomou veveeni telexusi. La sou ane'i latala ane mikasou ne mimauli.
Copyright information for
ATA